Главная » 2014 » Июль » 3 » Таом ортиб қолса исроф бўладими ёки...
09:41
Таом ортиб қолса исроф бўладими ёки...
Савол: ассалому алайкум, қори ака! Саволим исроф ҳақида: бир коса таомни охиригача еб бўлмасидан тўйиб қолса, қолган таом исроф бўладими ёки “қолиб кетмасин” деб ҳаммасини еб қўйса исроф бўладими? Жавоб: ва алайкумус салом. “Исроф” сўзи “ҳаддидан ошиш”, “чегарадан чиқиш” маъносини англатади. Таомдаги исроф биринчидан, ҳалол бўлмаган нарсаларни ейиш, қолаверса, ҳожатдан ташқари, тўйгандан кейин ҳам ейишни давом эттиришдир. Инсон ҳалок бўлмаслиги учун еб-ичиши фарз. Тўйиб овқатланиш мубоҳ. Тоат ва вожибларни янада кўпроқ бажариш учун тўйиб овқатланиш мандубдир. Тўйгандан кейин ҳам таом ейиш макруҳ ёки ҳаромдир. Демак, банда таом ва ичимлик борасида чегарадан чиқиши мумкин эмас. Сабаби бу молни зое қилиш ва соғлиққа зарар етказишдир. Шундан келиб чиқиб айтиш мумкин, бир коса таом тугамасидан олдин қорин тўйиб қолса, таом ейишни тўхтатилади. Таомнинг ортиб қолиши эмас, балки тўқ қоринга ейишда давом этиш исрофдир. Хавотир олманг, сиздан ортиб қолса, кейинроқ ўзингиз ёки бошқалар, жуда бўлмаса, чорвалар ейди. Аммо тўқ қоринга ейишда давом этсангиз, таомни исроф қилган, соғлиғингизга зарар етказган бўласиз. Зеро, тўйгандан кейин ҳам ейишда давом этиш захлаган ерга сув қуйиш билан баробар.