Савол: ассалому алайкум, Одилхон қори ака. Типратикан гўшти ҳалолми? Жавоб: ва алайкумус салом. Йўқ, ҳалол эмас. У сичқон, каламуш каби кемирувчилар туркумига киради. “Ўзбек тилининг изоҳли луғати”да типратиканга “усти ва ёнлари игнасимон тиканлар билан қопланган ҳашаротхўр сутэмизувчи кичкина ҳайвон, кирпи” дея изоҳ берилган. Демак, типратикан турли ҳашарот ва нопок нарсаларни истеъмол қилади. Шундай экан, унинг гўшти ҳалол эмас. Баъзилар, типратикан шўрваси шамоллашга даво, деб ундан таом тайёрлаб истеъмол қиладилар. Унутмайликки, қарилик ва ўлимдан бошқа ҳар қандай нарсанинг давоси бор. Аллоҳ касалликларга ҳалол нарсаларни шифо қилган. Аммо ҳаром нарсаларни ҳеч қачон шифо қилмаган У Зот, балки ҳаром нарсалар истеъмолидан бандаларни қайтарган. Хоҳ истеъмол учун, хоҳ даволаниш мақсадида бўлсин, банда асли пок нарсаларни ишлатиши лозимдир. Сабаби киши танасига кираётган ҳар бир луқма таом ва дори унинг соғлиғига, руҳиятига таъсир қилади.