Аллоҳ таоло маст қилувчи, танани бўшаштирувчи ҳар қандай нарсани ҳаром қилган. Номи ва тузилиши қандай бўлишидан қатъи назар, маст қилиш ва танани бўшаштириш хусусиятига эга бўлса, бас, ҳаром бўлади. Мусулмон банда ҳаромдан ҳазар қилиши, унинг яқинига ҳам йўламаслиги талаб этилади. Маст қилувчи ичимликлар сирасига ароқ, пиво, коняк, шампан виноси кабилар киради. Баъзилар пивонинг ўзи ёки спиртсиз пиво ҳақида савол берадилар. Бунга жавобимиз шуки, пиво шубҳасиз ҳаром. Гарчи муттасил ароқ ичиб юрган кимсалар пиво ичганда маст бўлмасалар ҳам пиво ҳаромлигича қолаверади. Сабаби пивони биринчи истеъмол қилган банда маст бўлади, тани бўшашади. Мана шу нарса пивонинг ҳаромлигига далилдир. Яна ҳадиси шарифларнинг бирида: “Кўпи маст қилувчи ичимликнинг ози ҳам ҳаром”, дейилган. Пиво озроқ ичилганда маст қилмаслиги мумкин. Аммо ундан кўпроқ татиб кўрилса, банда қай аҳволга тушиши маълум бўлади. Энди спиртсиз пиво ҳақида гапирадиган бўлсак, бу пивонинг номи “спиртсиз” бўлади, холос. Аслида ҳар қандай пиво алкоголдан холи бўлмайди. Ўша спиртсиз, деб айтилаётган пиволарда ҳам маълум миқдорда спирт мавжуд бўлади. Асли нопок бўлган нарса нопокликдан холи бўлса, ўз моҳиятини йўқотади. Шу сабаб мусулмон банда бундай ичимлик ва шубҳали маҳсулотлардан тийилгани маъқул. Баъзилар: “Агар бандага пивонинг спиртсиз экани исботлаб берилса, уни ичишда ҳеч қандай зарар йўқ”, дейдилар. Аммо бу фатво. Тақво йўлини тутган банда ҳар қандай ҳаром, нопок ва шубҳали ичимлик ва таомлардан эҳтиёт бўлиши лозим.