Савол: менинг ишим билан дўстимнинг машинасида кетаётганимизда, Дан ходимлари қоида буздинг, деб машинани тўхтатишди. Дўстим улар билан гаплашиб, ёнимга келди-да, қарзга пул сўради. Пул аниқ порага кетишини билиб турсам ҳам унга қарз бердим. Мен энди дўстимнинг гуноҳига шерикманми? Жавоб: биринчидан, йўл ҳаракати қоидасини бузган одам давлат томонидан белгиланган жаримани тўлаши керак. Унинг ярми ёки учдан бирини ходимга бериш айнан пора ҳисобланади. Иккинчидан, пора бериш ҳам, порага қарз бериб туриш ҳам мумкин эмас. Сабаби бир нарса ҳаром қилинган бўлса, унга олиб борувчи, ўша ҳаром иш содир бўлишига сабаб бўлувчи омил ҳам ҳаром бўлади. Масалан, зино қилиш ҳаром. Ўзи қилмаса-да, биров зино қилишига шароит яратиб бериш ҳам ҳаром. Порага қарз бериш ҳам худди шундай.
